‘Nitawashtaki kwa Raila,’ Ruto awaambia wakaazi wa Kondele

Na Jabali Media

Rais William Samoei Ruto, ametishia ‘kuwashtaki’ wakaazi wa eneo la Kondele jijini Kisumu kwa kinara wa chama cha ODM Raila Odinga, ikiwa wataendelea ‘kumsumbua.’

Akiwahutubia waakazi wa Kondele mnamo Jumamosi kwa mara ya kwanza tangu alipolazimika kuondoka eneo hilo kwa kasi ya farasi wakati msafara wake uliposhambuliwa kwa mawe mwaka 2021, wakati wa kampeni za kuelekea uchaguzi mkuu wa mwaka 2022, Ruto amesema kuwa wana-Kondele wamekuwa mwiba kwenye kidole chake kwa mda mrefu.

Wakati huo, Ruto alikuwa naibu wa rais akipasha misuli moto kumenyana na Odinga kwenye kinyang’anyiro cha urais mwaka 2022, ambapo aliibuka mshindi.

"Watu wa Kondele, kumbe ni nyinyi? Niko na kesi kubwa na nyinyi watu wa Kondele. Mmenitesa sana,” alisema Ruto mnamo Jumamosi.

Amesema kuwa ikiwa ‘usumbufu wa wana-Kondole hautakoma, hatakuwa na budi ila kuwashtaki kwa Baba (Raila Odinga).

“Mkiendelea kunitesa nitawashtaki kwa Baba na mkizidi nitawashtaki kwa Mungu.”

Amewapongeza wakaazi hao kwa kumkaribisha kwa shangwe, nderemo na hoi hoi, kinyume na ilivyokuwa miaka mitatu iliyopita.

“Wacha nichukue nafasi hii kuwashukuru sana kwa kunibarisha hapa Kisumu pacho,” akasema kiongozi wa nchi.

Ruto alianza ziara yake katika eneo la Nyanza mnamo Jumatano, ambapo alizuru Migori, Homabay na Siaya kabla ya kutua Kisumu kwa uzinduzi wa miradi mbali mbali ya maendeleo.

Alifunga safari ya Nyanza siku moja baada ya kuongoza hafla ya uzinduzi wa mchakato wa Odinga, kugombea nafasi ya mwenyekiti wa Tume ya Umoja wa Bara Afrika (AUC).

Uchaguzi wa mwenyekiti mpya wa AUC, kuziba pengo la raia wa Chad Moussa Faki Mahamat anayeondoka, utaandaliwa mwezi Februari mwaka ujao, jijini Addis Ababa, nchini Ethiopia.

Odinga anamenyana na wapinzani watatu, akilenga kuwa mkenya wa kwanza kushikilia wadhifa huo.